«ՍԻԹԻ»

ՍԱՀՄԱՆԱՓԱԿ ՊԱՏԱՍԽԱՆԱՏՎՈՒԹՅԱՄԲ ԸՆԿԵՐՈՒԹՅԱՆ ԿԱՅՔԻ

ԵՎ ԲՋՋԱՅԻՆ ՀԱՎԵԼՎԱԾԻ ՕԳՏԱԳՈՐԾՄԱՆ ՊԱՅՄԱՆՆԵՐ

Սույն օգտագործման համաձայնագիրը կնքվում է «ՍԻԹԻ» սահմանափակ պատասխանատվությամբ ընկերության (գրանցման համար և ամսաթիվ՝ 290.110.1017663, 14.05.2018թ., ՀՎՀՀ՝ 01282006, հասցե՝ ՀՀ, քաղաք Երևան, Օհանովի 15/1) (այսուհետ՝ նաև «Ընկերություն») և Ընկերության սեփականությունը հանդիսացող «www.yerevan-city.am» կայքից և/կամ «Yerevan City» բջջային հավելվածից (կայքը և բջջային հավելվածը միասին հիշատակվելիս՝ նաև «Առցանց խանութ») օգտվողի (այսուհետ՝ նաև «Օգտատեր») միջև (Ընկերությունը և Օգտատերը միասին հիշատակվելիս՝ նաև «Կողմեր») և սահմանում է Օգտատիրոջ կողմից Առցանց խանութի միջոցով ապրանքների ձեռքբերման պայմանները և կարգը (այսուհետ՝ նաև «Օգտագործման համաձայնագիր»):

.

ՀԻՄՆԱԿԱՆ ՀԱՍԿԱՑՈՒԹՅՈՒՆՆԵՐԸ

• Առցանց խանութ - https://www.yerevan-city.am հասցեում գտնվող «www.yerevan-city.am» կայքը և/կամ App Store-ում և/կամ Google Play-ում գտնվող «Yerevan City» բջջային հավելվածը, որոնք սեփականության իրավունքով պատկանում են Ընկերությանը, որտեղ ներկայացված է առցացն պատվիրելու համար նախատեսված Ընկերության կողմից առաջարկվող ապրանքատեսականին և որտեղ նշված են դրանց առաքման, վճարման, վերադարձման և այլ պայմանները:
• Ապրանք - Առցանց խանութում Օգտատիրոջ կողմից պատվերի ձևակերպման համար հասանելի ցանկացած ապրանք, որը ներկայացված է Առցանց խանութում:
• Օգտատեր - համացանցի միջոցով Առցանց խանութին հասանելիություն ունեցող և Առցանց խանութից օգտվող չափահաս ֆիզիկական անձ:
• Պատվեր - Առցանց խանութում ներկայացված ապրանքատեսականու ձեռքբերմանն ուղղված Օգտատիրոջ կողմից ձևակերպված հարցում:
• Առաքիչ - անձ, ով հանդիսանում է Ընկերության աշխատակիցը և վերջինիս անունից իրականացնում է պատվիրված ապրանքի առաքումն Օգտատիրոջը:

1. ԸՆԴՀԱՆՈՒՐ ԴՐՈՒՅԹՆԵՐԸ

1.1. Սույն համաձայնագիրը համարվում է կնքված Օգտատիրոջ կողմից Առցանց խանութում գրանցման պահից: Պատվիրելով ապրանքները Առցանց խանութի միջոցով՝ Օգտատերը համաձայնում է ապրանքների վաճառքի պայմաններին, որոնք սահմանված են սույն համաձայնագրով:

1.2. Օգտատերը պարտավոր է ծանոթանալ սույն համաձայնագրով սահմանված դրույթներին նախքան Առցանց խանութում գրանցվելը: Սույն համաձայնագրով սահմանված պայմանների հետ համաձայն չլինելու դեպքում Օգտատերը պետք է զերծ մնա Առցանց խանութից օգտվելուց:

1.3. Սույն համաձայնագրով նախատեսված ապրանքի վաճառքի պայմանները, ինչպես նաև Առցանց խանութում ներկայացված ապրանքի մասին տեղեկատվությունը հանդիսանում են հրապարակային օֆերտա:

1.4. Գրանցվելով Առցանց խանութում և համաձայնվելով սույն համաձայնագրի պայմանների հետ՝ Օգտատերն հաստատում է, որ ապրանքը ձեռք է բերում բացառապես անձնական, ընտանեկան, տնային և այլ կարիքների համար, որոնք կապված չեն ձեռնարկատիրական գործունեության իրականացման հետ։

2. ՊԱՏՎԵՐԻ ՁԵՎԱԿԵՐՊՈՒՄԸ ԵՎ ԿԱՏԱՐՄԱՆ ԺԱՄԿԵՏՆԵՐԸ

2.1. Առցանց խանութի միջոցով պատվերների ձևակերպման համար Օգտատերը նախևառաջ պետք է գրանցվի Առցանց խանութում:

2.2. Առցանց խանութում գրանցվելիս, ի թիվս Ընկերության կողմից պահանջվող այլ տեղեկատվության, Օգտատիրոջ կողմից պետք է տրամադրվեն հետևյալ տեղեկությունները.

• հեռախոսահամարը (բոնուս քարտի առկայության դեպքում հեռախոսի համարը նշելուց հետո Առցանց խանութում լրացման ենթակա մնացած տեղեկությունները ավտոմատ կերպով ներբեռնվում և լրացվում են համապատասխան դաշտերում, իսկ բացակայության դեպքում Օգտատիրոջ համար Ընկերության կողմից Առցանց խանութի միջոցով ձևակերպվում է վիրտուալ բոնուս քարտ),
• Ընկերության կողմից կարճ հաղորդագրության (SMS) միջոցով ուղարկված ծածկագիրը,
• անուն, ազգանունը,
• ծննդյան ամսաթիվը,
• էլեկտրոնային փոստի հասցեն,
• սեռը,
• հասցեն:

2.3. Գրանցվելուց հետո Օգտատերն իրականացնում է ապրանքի ընտրությունը Առցանց խանութում և ընտրված ապրանքը տեղափոխում է զամբյուղի մեջ պատվերի ձևակերպման համար: Օգտատերը մինչև պատվերի հաստատումը կարող է ինքնուրույն հեռացնել և ավելացնել ապրանքները զամբյուղից։

2.4. Առցանց խանութում տեղադրված լուսանկարները կարող են որոշակիորեն տարբերվել իրական ապրանքից: Ապրանքը ուղեկցող նկարագրությունները կամ բնութագրերը սպառիչ չեն և կարող են պարունակել անճշտություններ: 

2.5. Ընտրելով ցանկալի ապրանքը և տեղափոխելով այն զամբյուղի մեջ՝ Օգտատերը պարտավոր է լրացնել առաքման հասցեն։

2.6. Պատվերը ձևակերպելիս Օգտատերը պետք է տրամադրի իրական և վավեր տվյալներ, որոնք անհրաժեշտ են պատվերի կատարման համար։ Ընկերությունը պատասխանատու չէ Օգտատիրոջ կողմից տրամադրված տվյալների ճշտության և վավերականության համապատասխանության և դրանց պատճառով առաջացած հետևանքների համար:

2.7. Պատվերը ձևակերպելիս, ի թիվս Ընկերության կողմից պահանջվող այլ տեղեկատվության, Օգտատիրոջ կողմից պետք է նշվեն.

• առաքման ժամանակահատվածը,
• պատվերը ստացողի անունը, եթե վերջինս Օգտատերը չէ,
• լրացուցիչ հեռախոսահամար՝ ըստ անհրաժեշտության,
• վճարման եղանակը,
• բոնուս քարտի միջոցով վճարման ցանկության դեպքում՝ բոնուս քարտից գանձման ենթակա գումարի չափը,
• մեկնաբանություններ՝ ըստ անհրաժեշտության:

2.8. Պատվերի հաստատման, ինչպես նաև պատվերի հավաքման, առաքման, տեղում լինելու և ավարտված լինելու փուլերի մասին Օգտատերը տեղեկացվում է Ընկերության կողմից վերջինիս ուղարկվող փուշ հաղորդագրությունների միջոցով:

2.9. Եթե Ընկերության պահեստում բացակայում է զամբյուղ տեղափոխված ապրանքը, ապա Ընկերությունն այդ մասին ծանուցում է Օգտատիրոջն Առցանց խանութի միջոցով կամ որևէ այլ եղանակով:

2.10. Կանխիկ եղանակով կամ POS տերմինալի միջոցով վճարում կատարելու դեպքում Օգտատերն իրավունք ունի իրականացնել հաստատված պատվերի ինչպես ավելացում, այնպես էլ նվազեցում, իսկ անկանխիկ եղանակով վճարման դեպքում, Օգտատերը կարող է իրականացնել միայն պատվիրված ապրանքների նվազեցում։ Նման փոփոխությունը կարող է կատարվել միայն մինչև Օգտատիրոջ կողմից առաքման վերաբերյալ փուշ հաղորդագրություն ստանալը: Ընդ որում, եթե վճարումը կատարվել է Առցանց խանութում անկանխիկ եղանակով, ապա Ընկերությունն իրականացնում է վերահաշվարկ և անհրաժեշտության դեպքում ավել սառեցված դրամական միջոցները ապրանքը ստանալուց հետո 1 (մեկ) օրվա ընթացքում վերադարձնում է այն բանկային հաշվին, որից կատարվել է վճարումը, իսկ վճարումը Tell Cell համակարգի միջոցով կատարված լինելու դեպքում ավել վճարված գումարը փոխանցվում է Օգտատիրոջ՝ Առցանց խանութում գրանցված բոնուս քարտին:

3. ՎՃԱՐՄԱՆ ԿԱՐԳԸ

3.1. Ապրանքի գինը նշվում է Առցանց խանութում ՀՀ դրամով: Գինը ներառում է ՀՀ օրենսդրությամբ նախատեսված բոլոր հարկերը:

3.2. Պատվերի ընդհանուր արժեքը ձևավորվում է Օգտատիրոջ կողմից զամբյուղ տեղափոխված բոլոր ապրանքների, ինչպես նաև դրանց առաքման և վերջնական փաթեթավորման համար օգտագործված տոպրակների արժեքի հանրագումարից: Աոաքման և պատվիրված ապրանքի փաթեթավորման համար օգտագործված տոպրակների համար գանձվող գումարի չափը նույնպես նշվում է Առցանց խանութում:

3.3. Օգտատերն ունի հնարավորություն ընտրելու առաքման ժամկետը, որը չի կարող գերազանցել պատվերը հաստատվելուց հետո 1 օրը:

3.4. Ընկերությունն իրավունք ունի միակողմանի փոփոխել ապրանքի գինը մինչև Օգտատիրոջ կողմից պատվերի հաստատումը։

3.5. Առցանց խանութում պատվերի համար վճարումը կատարվում է երկու եղանակով.

3.5.1. անմիջապես պատվերի ստացման ժամանակ 

• կանխիկ դրամական միջոցներով կամ
• POS տերմինալի (POS տերմինալի միջոցով վճարման ցանկության դեպքում Օգտատերը պարտավոր է պատվերը ձևակերպելիս նշել այդ մասին) միջոցով բանկային քարտից,

3.5.2. Առցանց խանութում առկա վճարային համակարգի միջոցով անկանխիկ փոխանցում կատարելով։ 

3.6. Օգտատերը իրավունք ունի Առցանց խանութում իր անձնական էջին կցել բանկային քարտ/քարտեր: 

3.7. Վճարման պայմանները վերահսկվում են երրորդ անձ հանդիսացող բանկերի, ինչպես նաև վճարահաշվարկային կազմակերպությունների կողմից, որոնց հետ համագործակցում է Ընկերությունը:

3.8. Ընտրելով անկանխիկ եղանակով վճարման տարբերակը՝ Օգտատերը հաստատում է, որ տեղյակ է և համաձայն երրորդ անձ հանդիսացող բանկերի կամ վճարահաշվարկային կազմակերպությունների կանոնների հետ, և որ Ընկերության նկատմամբ վերջիններիս կողմից սահմանված պայմանների հետ կապված որևէ առարկություն և/կամ պահանջ չունի:

3.9. Առցանց խանութում առկա վճարային համակարգի միջոցով անկանխիկ վճարման տարբերակն ընտրելիս՝ Օգտատերը պետք է վճարի պատվերում նշված գումարն ամբողջությամբ: Ոչ ամբողջական վճարման դեպքում (անբավարար վճարում կամ անբավարար միջոցներ) պատվերը չի հաստատվում և չի մշակվում համակարգում: Նման պարագայում Օգտատիրոջից որևէ գումար չի գանձվում:

4. ՊԱՏՎԵՐԻՑ ՀՐԱԺԱՐՎԵԼՈՒ ԵՎ ԱՌԱՔՎԱԾ ԱՊՐԱՆՔԸ

ՎԵՐԱԴԱՐՁՆԵԼՈՒ ԿԱՐԳԸ

4.1. Օգտատերն իրավունք ունի հրաժարվել պատվիրված ապրանքից մինչև առաքման փուլի վերաբերյալ փուշ հաղորդագրություն ստանալը:

4.2. Առաքված ապրանքից Օգտատիրոջ հրաժարվելու դեպքում Ընկերությունն իրավունք ունի Օգտատիրոջ կողմից փոխանցված դրամական միջոցներից պահել առաքման ծառայությունների արժեքը: Չստացված ապրանքի դիմաց Օգտատիրոջ կողմից վճարված գումարը վերադարձվում է վերջինիս՝ սույն համաձայնագրով սահմանված ժամկետներում: Եթե վճարումը պետք է կատարվի կանխիկ կամ POS տերմինալի միջոցով, Ընկերությունն իրավունք ունի Օգտատիրոջից պահանջել չընդունված ապրանքների առաքման ծառայությունների վճարում:

4.3. Ապրանքը ստանալու պահին Օգտատերը պարտավոր է ստուգել ստացված ապրանքների համապատասխանությունը (քանակ, որակ և այլն) իր պատվերին միայն առաքչի ներկայությամբ: 

4.4. Պատվերը ստանալու պահին Օգտատիրոջ կողմից անպատշաճ որակի ապրանքներ հայտնաբերվելու կամ ստացված ապրանքները պատվերին չհամապատասխանելու դեպքում Օգտատերն իրավունք ունի պահանջել այդ ապրանքները փոխարինել պատշաճ որակի ապրանքներով կամ հրաժարվել դրանք ընդունելուց և պահանջել վերադարձնել անպատշաճ որակի ապրանքների համար վճարված գումարը: Ընկերությունը պարտավոր է այդ ապրանքը փոխարինել Օգտատիրոջ պահանջը ստանալուց հետո մեկ օրվա ընթացքում: Եթե պահանջը ներկայացնելու պահին Ընկերության մոտ բացակայում է փոխարինման համար անհրաժեշտ ապրանքը, ապա Ընկերությունը պարտավոր է մեկ օրվա ընթացքում տեղեկացնել Օգտատիրոջը ապրանքի բացակայության մասին և սույն համաձայնագրով սահմանված ժամկետներում վերջինիս վերադարձնել չստացված ապրանքի դիմաց վճարված գումարը:

4.5. Եթե ապրանքի համար սահմանված է երաշխիքային ժամկետ, Օգտատերն իրավունք ունի ապրանքի թերությունների հետ կապված պահանջներ ներկայացնել, եթե թերությունները հայտնաբերվել են երաշխիքային ժամկետի ընթացքում:

4.6. Առաքված ապրանքների նկարագրության, դիզայնի և/կամ ձևավորման ոչ էական տարբերությունները Առցանց խանութում ներկայացվածի հետ չեն կարող վկայել անպատշաճ որակի մասին:

4.7. Օգտատերն իրավունք չունի վերադարձնել ձեռք բերված պատշաճ որակի պարենային, ինչպես նաև ՀՀ կառավարության կողմից սահմանված վերադարձման և/կամ փոխարինման ոչ ենթակա ապրանքները:

4.8. Օգտատերն իրավունք ունի պատշաճ որակի ոչ պարենային ապրանքն օրենքով սահմանված ժամկետներում վերադարձնելու Ընկերությանը կամ դրանք փոխարինելու այլ չափի, ձևի, գույնի կամ համանման կոմպլեկտայնության ապրանքով` գնի տարբերության դեպքում անհրաժեշտ վերահաշվարկ կատարելով Ընկերության հետ:

4.9. Պատշաճ որակի ապրանքը չի կարող վերադարձվել.

• եթե ապրանքների պատրաստումը և մատակարարումը իրականացվել են Օգտատիրոջ հատուկ պահանջներին համապատասխան, կամ ապրանքները անհատականացված են, 
• երբ մատակարարվում են ապրանքներ, որոնք ունեն արագ փչացման, քայքայման կամ որակի փոփոխության հատկություն, 
• կապարակնքված ապրանքների վաճառքի դեպքում, որոնք վերադարձման ենթակա չեն առողջապահական կամ հիգիենիկ նկատառումներից ելնելով, և որոնք մատակարարվելուց հետո ապակապարակնքվել են գնորդի կողմից,
• ապրանքների վաճառքի դեպքում, որոնց մատակարարումից հետո, իրենց բնույթից ելնելով, անքակտելիորեն միախառնվում են միմյանց հետ:

4.10. Ապրանքը վերադարձնելու կամ փոխարինելու մասին Օգտատիրոջ պահանջը բավարարվում է, եթե ապրանքը չի օգտագործվել, պահպանված են դրա սպառողական հատկանիշները և առկա են ապրանքն Ընկերությունից ձեռք բերելու մասին ապացույցներ:

4.11. Պատշաճ որակի ոչ պարենային ապրանքը վերադարձնելու կամ փոխարինելու հետ կապված ծախսերը կատարվում են Օգտատիրոջ հաշվին:

4.12. Սույն համաձայնագրով նախատեսված դեպքերում Ապրանքի համար վճարված դրամական գումարի վերադարձման պահանջները ենթակա են բավարարման համապատասխան պահանջը ներկայացնելու օրվանից 15 օրվա ընթացքում:

4.13. Ընկերությունն իրավունք ունի մերժել Առցանց խանութի միջոցով պատվերի ձևակերպումը, եթե նախկինում Օգտատիրոջ կողմից կատարված պատվերները չեն ստացվել վերջինիս կողմից իր մեղքով (Օգտատերը չի բացել դուռը կամ պատվերն առաքվելու ընթացքում չի պատասխանել առաքչի կամ Ընկերության աշխատակցի զանգերին կամ նշել է առաքման գոյություն չունեցող հասցե և այլն):

5. ԿՈՂՄԵՐԻ ԻՐԱՎՈՒՆՔՆԵՐԸ ԵՎ ՊԱՐՏԱԿԱՆՈՒԹՅՈՒՆՆԵՐԸ

5.1. Ընկերությունն իրավունք ունի.

• Օգտատիրոջ կողմից սույն համաձայնագրով սահմանված պայմանների խախտման դեպքում սահմանափակել կամ արգելել վերջինիս մուտքն Առցանց խանութ,
• պահանջել Օգտատիրոջից վճարել առաքված և վերջինիս կողմից ընդունված ապրանքի դիմաց սահմանված գումարը,
• իրականացնել ՀՀ օրենսդրությունից և Օգտագործման համաձայնագրից բխող այլ իրավունքներ:

5.2. Ընկերությունը պարտավոր է.

• ապահովել Օգտատիրոջ անձնական տվյալների գաղտնիությունը՝ Առցանց խանութում տեղադրված «գաղտնիության քաղաքականության» պայմաններին համապատասխան,
• կատարել ՀՀ օրենսդրությունից և Օգտագործման համաձայնագրից բխող այլ պարտականություններ:

5.3. Օգտատերն իրավունք ունի.

• Առցանց խանութում գրանցվելուց հետո այն օգտագործելու համար ստանալ հասանելիություն,
• օգտվել Առցանց խանութում առկա բոլոր ծառայություններից, ինչպես նաև ձեռք բերել կամ հրաժարվել Առցանց խանութում առաջարկվող ցանկացած ապրանք ձեռք բերելուց,
• Առցանց խանութի միջոցով Ընկերության կողմից մատուցվող ծառայությունների վերաբերյալ ներկայացնել ցանկացած տեսակի հարցեր Առցանց խանութում առկա ցանկացած հաղորդակցության միջոցով,
• օգտվել Առցանց խանութից բացառապես Օգտագործման համաձայնագրով նախատեսված և ՀՀ օրենսդրությամբ չարգելված նպատակներով և կարգով,
• իրականացնել ՀՀ օրենսդրությունից և սույն համաձայնագրից բխող այլ իրավունքներ:

5.4. Օգտատերը պարտավոր է.

• առաքված ապրանքի համար վճարել սույն համաձայնագրով սահմանված կարգով,
• տրամադրել լրացուցիչ տեղեկատվություն, որն անմիջական կապ ունի Առցանց խանութի կողմից մատուցվող ծառայությունների հետ,
• Առցանց խանութի օգտագործման ժամանակ պահպանել հեղինակների և այլ իրավատերերի գույքային և ոչ գույքային իրավունքները,
• չձեռնարկել որևէ գործողություն, որը կարող է ազդել Առցանց խանութի բնականոն գործունեության վրա,
• Առցանց խանութի միջոցով չտարածել ֆիզիկական և/կամ իրավաբանական անձանց վերաբերող և ՀՀ օրենսդրությամբ պահպանվող գաղտնի տեղեկատվությունը,
• խուսափել ցանկացած տիպի գործողություններից, որոնց արդյունքում կարող է խախտվել ՀՀ օրենսդրությամբ պահպանվող տեղեկատվության գաղտնիությունը,
• կատարել ՀՀ օրենսդրությունից և սույն համաձայնագրից բխող այլ պարտականություններ:

6. ՀԵՂԻՆԱԿԱՅԻՆ ԻՐԱՎՈՒՆՔԸ

6.1. Առցանց խանութի բովանդակությունը, դիզայնը, տեքստը, գրաֆիկան և ինտերֆեյսները և դրանց դասավորությունը հանդիսանում են Ընկերության սեփականությունը:

6.2. Առցանց խանութում Օգտատիրոջ գրանցումը չի հանգեցնում Ընկերությանը պատկանող մտավոր գործունեության արդյունքների և անհատականացման միջոցների նկատմամբ բացառիկ իրավունքների փոխանցմանը Օգտատիրոջը:

6.3. Առանց Ընկերության համաձայնության վերջինիս պատկանող մտավոր գործունեության արդյունքների և անհատականացման միջոցների օգտագործումը չի թույլատրվում։

6.4. Սույն համաձայնագրի 6.3.-րդ կետի խախտում հայտնաբերելու դեպքում Ընկերությունը կարող է սահմանափակել Օգտատիրոջ մուտքն Առցանց խանութ:

7. ԿՈՂՄԵՐԻ ՊԱՏԱՍԽԱՆԱՏՎՈՒԹՅՈՒՆԸ

7.1. Ընկերությունը պատասխանատվություն չի կրում Առցանց խանութի միջոցով պատվիրված ապրանքների ոչ պատշաճ օգտագործման՝ այդ թվում պահպանման ժամկետների և պայմանների խախտման հետևանքով Օգտատիրոջը պատճառված վնասների համար:

7.2. Ապրանքի բաղադրության մեջ կարող են ընդգրկվել այնպիսի բաղադրիչներ, որոնք առաջացնում են ալերգիկ ռեակցիաներ: Պատվիրելով ապրանքը Առցանց խանութում՝ Օգտատերն հաստատում է, որ ծանոթացել է իր ընտրած ապրանքի բաղադրությանը և դրա հետ կապված Ընկերության նկատմամբ պահանջներ չունի:

7.3. Ընկերությունը պատասխանատվություն չի կրում Օգտատիրոջ կողմից պատվերի սխալ լրացման, ինչպես նաև իր տվյալների սխալ նշման արդյունքում վերջինիս կրած վնասների համար:

8. ԱՆՀԱՂԹԱՀԱՐԵԼԻ ՈՒԺԻ ԱԶԴԵՑՈՒԹՅՈՒՆԸ

8.1. Սույն համաձայնագրով պարտավորություններն ամբողջությամբ կամ մասնակիորեն չկատարելու համար Կողմերն ազատվում են պատասխանատվությունից, եթե դա եղել է անհաղթահարելի ուժի ազդեցության հետևանքով, որը ծագել է սույն համաձայնագիրն ուժի մեջ մտնելուց հետո, և որը Կողմերը չէին կարող կանխատեսել կամ կանխարգելել։ Այդպիսի իրավիճակներից են` երկրաշարժը, ջրհեղեղը, հրդեհը, պատերազմը, ռազմական և արտակարգ դրություն հայտարարելը, քաղաքական հուզումները, գործադուլները, հաղորդակցության միջոցների աշխատանքի դադարեցումը, պետական մարմինների ակտերը, էլեկտրական էներգիայի տատանումները, անբարենպաստ եղանակային պայմանները, տեխնիկական համակարգերի խափանումները, խցանումները և այլ հանգամանքներ, որոնք անհնարին են դարձնում կամ էականորեն դժվարացնում են սույն համաձայնագրով Կողմերի պարտավորությունների կատարումը։ 

8.2. Անհաղթահարելի հանգամանքների ի հայտ գալու դեպքում Կողմերի պարտավորությունների կատարման ժամկետները հետաձգվում են այդ հանգամանքների և դրանց հետևանքների գործողության ժամանակին համապատասխան: 

8.3. Կողմը, որի համար պարտավորության կատարումն անհնարին է դարձել կամ էականորեն դժվարացել է անհաղթահարելի ուժի ազդեցության հետևանքով, պարտավոր է անհապաղ այդ մասին տեղեկացնել մյուս կողմին:

9. ՎԵՃԵՐԻ ԼՈՒԾՄԱՆ ԿԱՐԳԸ

9.1. Սույն համաձայնագրի կապակցությամբ ծագած ցանկացած վեճ լուծվում է բանակցությունների միջոցով: 

9.2. Կողմերը փոխադարձ համաձայնությամբ Օգտագործման համաձայնագրից բխող վեճերի լուծման եղանակ են սահմանում նախապահանջային եղանակը:

9.3. Խախտում վկայակոչող կողմը ենթադրյալ խախտում թույլ տված կողմին խախտման վերաբերյալ ներկայացնում է գրավոր նախապահանջ: Նախապահանջը ստանալու պահից 15 օրացուցային օրվա ընթացքում դրա վերաբերյալ պատասխան չստացվելու կամ ներկայացված պահանջը մերժվելու դեպքում վեճը կարող է հանձնվել Հայաստանի Հանրապետության իրավասու դատարանի քննությանը:

9.4. Օգտագործման համաձայնագրի նկատմամբ կիրառելի իրավունք է հանդիսանում ՀՀ օրենսդրությունը:

10. ԱՅԼ ԴՐՈՒՅԹՆԵՐ

10.1. Օգտագործման համաձայնագիրն ուժի մեջ է մտնում Օգտատիրոջ կողմից Առցանց խանութում գրանցման պահից: Գրանցվելով Առցանց խանութում՝ Օգտատերն հավաստում է, որ ամբողջությամբ ծանոթացել է Առցանց խանութի Օգտագործման համաձայնագրի պայմաններին, Ընկերության Գաղտնիության քաղաքականությանը, Առցանց խանութի համակարգի գործունեությանը և որևէ առարկություն չունի դրանց վերաբերյալ:

10.2. Ընկերությունն իրավունք ունի ցանկացած պահի միակողմանի փոփոխել Օգտագործման համաձայնագիրը: Համաձայնագրի նոր խմբագրությունն ուժի մեջ է մտնում Ընկերության կողմից այն Առցանց խանութում տեղադրելու պահից: Յուրաքանչյուր պատվեր Առցանց խանութի միջոցով ձևակերպելիս Օգտատերն հավաստում է, որ ծանոթացել և համաձայն է տվյալ պահին Առցանց խանութում առկա Օգտագործման համաձայնագրի խմբագրությանը:  

10.3. Համաձայնագրի որևէ մասի գործողության դադարեցումը, չեղյալ հայտարարելը կամ անվավերությունը չի հանգեցնում մյուս մասերի դադարեցմանը, չեղյալ հայտարարելուն կամ անվավերությանը:

10.4. Օգտատիրոջ և Ընկերության միջև հարաբերությունների նկատմամբ ի թիվս այլոց կիրառելի են ՀՀ քաղաքացիական օրենսգրքով սահմանված մանրածախ առուվաճառքին վերաբերող, ինչպես նաև «Սպառողների իրավունքների պաշտպանության մասին» ՀՀ օրենքով սահմանված դրույթները:

10.5. Սույն համաձայնագիրը կազմված է հայերենով, ռուսերենով և անգլերենով և պարտադիր է Կողմերի համար։ Հայերեն, ռուսերեն և անգլերեն տեքստերի միջև տարընթերցումների դեպքում առավելությունը տրվում է Օգտագործման համաձայնագրի հայերեն տարբերակին: